Songfile & Text: Sam National
HATERS GONNA HATE – Sam National
HATERS GONNA HATE – instrumental
Strophe 1
Weisch die ganzi Gschicht hät eigentlich ganz harmlos aagfange
Sie sitzt uf ihrem Bett
Bruuni Haar
E Zahspange
S Handy ide Hand
Es Bravo Poster ade Wand
En ganz normale Teenie
wie so villi i däm Land
Sie stricht über de Bildschirm
Luegt sich d Instastories aa
Vo Fründe und Kollege
Wett au sones Läbe ha
Will alli gsehnd so glücklich us
So fresh und super fit
Sie luegt sich churz im Spiegel aa
und übt en sexy Blick.
Strophe 2
Dänn fasst sie sich es Herz
Und macht es Bild vo sich
Will hüt isch so en Abig
da ischs re schisse glich
Was alli andere dänked
will s Läbe isch nöd fair
sie stellt sich d Reaktione vor,
wänn sie beliebter wär.
Na schnäll en Catfish Filter
und an en deepe Spruch
so a la Kyle Jenner
mit me Zwinkersmiley druff.
Dänn posted sie das Bild
Und träumt chli vor sich hii
das chönt de Afang
vome neue Läbe für sie sii
Strophe 3
Au er isch na am Handy
woner das Bild entdeckt
er kännt sie vo de Schuel
hät na nie mit ihre gredt
Susch isch si sone schüchi gsi
wo nöd gross usesticht
doch woner gseht was andri schriibed
Dänkt er ane Gschicht
Wo ide Medie gsi isch vor guet eme Jahr
er liked ihres Bild und schribt en nette Kommentar
Refrain
Du bisch perfäkt so wie du bisch
au wänns chli andersch isch
will nume toti Fisch schwümed im Strom
Ganz egal was anderi säged, du bisch frei
– will Haters gonna hate it anyway
Strophe 4
Am nögschte Morge
wird si dänn uf eimal nervös
will gwüssi Kommentär zum Bild
sind würkli rächt bös
Beleidigt zwerde eifach so
vo Lüüt wo sie nöd kännt
Macht sie so trurig und verruckt
will sie sich für sich schämt.
Am liebschte wür sie hüt de ganz Tag nöd id schuel ga
Sich im Zimmer ischlüsse und ihre Friede ha
Doch s Mami gseht das andersch und schickt us em Huus
Mit Träne ide Auge wartet si uf ihre Bus.
Was wänn sie usglachet wird, wie söll sie sich verhalte?
Insgeheim da wünscht sie sich, s wär alles na bim Alte.
Strophe 5
Da plötzli gseh si sini Nachricht (und) dänkt na eimal na
und wo si gseht das er grad online isch, schribt sie en eifach aa.
Sie chatted uf em Wäg mit ihm, und fasst wieder chli Muet,
will öpper sie verstaht und nöd nur umehate tuet.
Die andre ide Schuel tüend alli so wie wänn nüt wär
sie luegt i ihri Gsichter, dänkt a ihri Kommentär
Strophe 6
Weisch die ganzi Gschicht hät eigentlich ganz harmlos aagfange
Sie sitzt uf ihrem Bett
Bruuni Haar
E Zahspange
Sie luegt sich churz im Spiegel aa
und macht es Bild vo sich
ganz ohni make up Filter
genauso wie sie isch
Doch statt, dass sie s dänn posted, schickt sis ihm privat
will sie für sich verstande hät, um was es würkli gat.
Refrain
Du bisch perfäkt so wie du bisch
au wänns chli andersch isch
will nume toti Fisch schwümed im Strom
Ganz egal was anderi säged, du bisch frei.
Will Du bisch perfäkt so wie du bisch
au wänns chli andersch isch
will nume toti Fisch schwümed im Strom
Ganz egal was du machsch, dänk immer dra:
Dass mer Fründe nöd mit Likes ersetze cha.